Ábyrga amman og loftslagsmálin

Þegar ungt fólk er spurt að því hvað sé mikilvægast í dag er svarið lang oftast loftslagsmál. Loftslagsvá. Umhverfið og náttúran. Framtíðin. 

Um síðustu aldamót þegar VG var að ræða umhverfis- og loftslagsmál þótti það ekki merkilegt og glott var að þessu undarlega fólki á vinstri vængnum sem var uppfullt af dómsdagsspám og svartsýni. Nú hefur komið í ljós að umræðan átti svo sannarlega rétt á sér.

Engin stjórnmálahreyfing hefur lagt eins mikla áherslu á þennan málaflokk og VG. Með Guðmund Inga í umhverfisráðuneytinu og Katrínu í forætisráðuneytinu er áherslan svo sannarlega á umhverfið og framtíðina. Spár segja að ef við snúum ekki við blaðinu verði framtíðin ekki björt, ég verð sennilega komin í gröfina þegar allt fer til andskotans, en ég á bæði börn og barnabarn. Ég vil að litla dásamlega ömmustelpan sem fæddist í sumar geti lifað á þessari plánetu í sátt við náttúru og menn. Sú sýn að á hennar fullorðinsárum þurfi fólk að flytjast búferlum um heiminn vegna breytinga í veðurfari og að öfgar í veðri, mengun og léleg loftgæði hafi neikvæð áhrif á lífsgæði er ekki heillandi. Sérfræðingar segja okkur að þó svo þróun í neikvæða átt sé hröð þá er ekki of seint að snúa við blaðinu. VG leggur áherslu á að vera í fararbroddi í að losa og menga minna og að heilnæmt umhverfi verði hluti af góðu samfélagi. Áhersla er á grænar lausnir og sjálfbærni í öllum málaflokkum þar sem umhverfið nýtur vafans, orkuskipti í almenningssamgöngum þar sem Herjólfur er svo sannarlega gott dæmi og hringrásarhagkerfi þar sem ekkert fer til spillis, svo eitthvað sé nefnt.

Ég er ekki sérfræðingur í loftslagsmálum, en ég vil vera ábyrga amman. Ég hef hlustað á fullt af fólki sem starfar með mér í VG sem svo sannarlega eru sérfræðingar. Það er einmitt þetta sem skiptir svo miklu máli, að við hlustum á sérfræðingana og framkvæmum hvert og eitt og öll sem eitt.

Þetta er ein af ástæðum þess að ég starfa með VG, fólk veit hvað það er að segja þegar kemur að loftslagsmálum. Það skiptir nefnilega máli hver stjórnar.

Helga Tryggvadóttir, 5. sæti